တီးမယ်

Friday, August 5, 2011

ငယ်ဘ၀ပေါက်က၇















(၁)

ကျွန်မ ငယ်ငယ်တုန်းကပေါ့ အဖေ နဲ့ အမေကို "မောင်နှမလို့"ထင်နေတာ။ ဘယ်သူမေးမေး အဖေ နဲ့ အမေက မောင်နှမလို့ ဘဲဖြေတယ်။ ဟီး ။ ဟုတ်ဖူးလား။ အကို တွေ အမတွေနဲ့ ကျွန်မက မောင်နှမလေ့။ အဲဒီတော့ အဖေ နဲ့ အမေကလည်း မောင်နှမပေါ့။

(၂)

ကျွန်မတို့အိမ်က တောင်ချွန်း နဲ့ ရွှေဖုန်းပွင့်တောင်တို့နဲ့ အရမ်းနီးတယ်။ တောင်ရိပ်ကျတယ်ပေါ့။ နံနက်ပိုင်း သူများအိမ်တွေ နေရောင်ရနေချိန်မှာ ကျွန်မတို့ အိမ်က ဝေလီဝေလင်းဖြစ်တုန်း။ တောင်ပေါ်က လှမ်းအော်ရင် အိမ်ကကြားရတယ်။ မြင်လည်းမြင်နိုင်တယ်။ တောင်ပေါ်ကနေ ကြားရတဲ့ပဲ့တင်သံ နဲ့ လွပ်လပ်မှု ကို အရမ်း သဘောကျတာ။ ဒါကြောင့်တောင်ပေါ်မှာ လျှောက်အော်နေကျ။ အဲဒီနေ့က စနေ တနင်္ဂနွေ ကျောင်းပိတ်ရက်ဆိုတော့ ကျွန်မတို့ မောင်နှမတွေနဲ့ သူငယ်ချင်းတွေ ထမင်းချိုင့်ထုပ်ပြီး တောင်ပေါ်လမ်းလျှောက်တက်ကြတယ်။ ဝက်ခေါင်းတောင် (တောင်ပေါ်မှာဝက်ခေါင်းပုံစံလေးဖြစ်နေသော တောင်အစွန်း) ပေါ်ကနေ အမေ အဝတ်တွေ ထွက်လှမ်းတာ မြင်တော့ ကျွန်မကလှမ်းအော်လိုက်တယ် "အမေ့ထမင်းစားပြီးပြီလားးးးလားးးးးလားးးးလားးး" အမေက ပြန်အော်တယ် "ကောင်းကောင်းနေ.....သိပ်မဆော့နဲ့.....” တဲ့။ ဟင်......ဘာမှလည်းမဆိုင်ဘူး။

(၃)

ကျွန်မတို့ငယ်ငယ်က ကျောင်းမှာ ကျောင်းကျန်းမာရေးစစ်ဆေးရေး အဖွဲ့တွေလာလေ့ရှိတယ်။ လက်သည်း ခြေသည်း တွေ စစ်တယ်။ အရပ်တိုင်းတယ်၊ ပေါင်ချိန်တယ်။ ပြီးရင် လိုအပ်တဲ့ကလေးတွေကို သံချဆေးတွေလည်းပေးတယ်။ အဲဒီတစ်ခေါက်ကျွန်မကို ဆရာဝန်က သံချဆေးပေးလိုက်တယ်။ ငါးလုံးတောင်။ ဘာမှန်းလည်းမသိပါဘူး။ ပေးတော့လည်းယူလိုက်တာပေါ့။ ဆေးကပန်းရောင်လေးနဲ့ အပြားကြီးကြီးတွေ။ ကျွန်မက အင်မတန် စပ်စုတော့ ဆေးကိုလျှာနဲ့လျက်ကြည့်တယ်။ သကြားလုံးလိုပဲ ဆေးကချိုတော့စားလိုက်တာ သုံးလုံးကုန်သွားတယ်။ ခဏနေကျတော့ဖျားလာလိုက်တာ ဟီးဟီးကိုထလို့။ ဆရာမက ပြန်ခိုင်းတော့ အမေ့ရုံးကို လိုက်သွားတယ်။ ကျွန်မက အမေ့ကိုပြောလိုက်တယ် "အမေ...... ကျောင်းကျန်းမာရေးက သကြားလုံးကျွေးလို့စားလိုက်တာ ၃ လုံးကုန်သွားတယ်။ အမေ့အတွက် ၂ လုံးချန်ထားတယ်......" လို့.....။ သံချဆေးတွေမြင်ပြီး ပြူးသွားတဲ့ အမေ့မျက်လုံးကို ကျွန်မ မမေ့ဘူး။

(၄)

ကျွန်မသူငယ်တန်းတုန်းက လစဉ်လတိုင်း လပတ်စာမေးပွဲဖြေရတယ်။ ပြီးရင် ရီပို့ကတ်မှာ မိဘတွေ လက်မှတ်ထိုးဖို့ ပေးလိုက်ပါတယ်။ သောကြာနေ့မှာ ပေးလိုက်တာ။ ဆရာမက တနင်္လာနေ့ပြန်ယူလာတဲ့။ ကျွန်မ စနေ တနင်္ဂနွေ နှစ်ရက်လုံးဆော့ဖို့ပဲသတိရပြီး ရီပို့ကတ်လက်မှတ်ထိုးခိုင်းဖို့မေ့သွားတယ်။ တနင်္လာနေ့ကျောင်းရောက်မှသတိရတယ်။ ဆရာမက ဆရာကြီးနဲ့ အမြဲခြောက်တတ်တော့ စဉ်းစားလိုက်တယ် ဘာလုပ်ရမလဲပေါ့။ ခပ်တည်တည်ဘဲ အမေ့လက်မှတ်ထိုးလိုက်တယ်။ ခင်.....လို့....။ ဆရာမ.... လာတော့ခပ်တည်တည်ပဲပေးလိုက်တယ်။

(မူကြိုကတည်းက ပထမဦးဆုံး အမေ လက်မှတ်ထိုးတာကိုမြင်တော့ ထူးဆန်းလို့ အမေ့ကိုလက်မှတ် ထိုးပြခိုင်းပြီး သင်ထားတာ.....ဟဲဟဲ)

(၅)

ကျွန်မ အမေက လတိုင်းထီထိုးတယ်။ ထီသွားဝယ်တိုင်းကျွန်မ မှာလေ့ရှိတာက "အမေ့ ပေါက်တဲ့နံပါတ်ရွေးထိုးနော်"..... တဲ့။ ထီတိုက်ပြီးလို့ ထီမပေါက်ရင်ကျွန်မက မကျေမနပ် အမေ့ကို အမြဲဆူလေ့ ပြောလေ့ရှိတာက "အမေက သမီးပြောသလို ပေါက်တဲ့နံပါတ်မှ ရွေးမထိုးတာကိုး".....လို့။

(၆)

ကျွန်မငယ်ငယ်က အရမ်းဆော့ပါတယ်။ နွေရာသီကျောင်းပိတ်ရင် အခြားမြို့တစ်မြို့မှာရှိတဲ့အဘွားအိမ် သွားလည်လေ့ရှိပါတယ်။ တစ်နွေလုံးနေတဲ့နှစ်လည်းရှိပါတယ်။ အဘွားက မနက်ဆို စောစောထ ဆွမ်းတော်ကပ်တဲ့အကျင့်ရှိတယ်။ ဆွမ်းတော်ကို တောဓလေ့အတိုင်း ငှက်ပျောသီးလေး ၊ ဘီစကွတ်မုန့်လေးတွေနဲ့တင်ပါတယ်။ အဖွားလည်း ဘုရားရှိခိုးပြီးရော ကျွန်မက "စွန့်ပါ ဘုရား" လုပ်ပြီး မုန့်တွေယူစားတော့တာဘဲ။ ပြီးရင် ကျန်တဲ့ထမင်းတော့ဒီတိုင်းထားခဲ့ပါတယ်။ အဘွားက အဒေါ်ကို ဆွမ်းတော်စွန့်ခိုင်းတိုင်း မုန့်တွေမရှိတော့တာသိတယ်။ နောက်တော့အဒေါ်က လိုက်မေးပါလေရော။ မေးတဲ့အချိန် မျက်နှာစပ်ဖြဲဖြဲလုပ်တဲ့ အကို နဲ့အစ်မ အရိုက်ခံရတယ်။ ကျွန်မ အမြဲလွတ်တယ်။ ရိုက်ခံရမှာပေါ့ သူတို့က အပိုးလည်းမကျိုး မှင်လည်း မသေတာကြီးကို....။

No comments:

Post a Comment